IFC外望——陳德霖大爆銀行刁難客戶

原來唔單止去銀行開戶困難，就連維持一個戶口都係咁困難。被視為特首跑馬仔黑馬之一嘅金管局總裁陳德霖（見圖）繼續通過《匯思》大講惠及市民嘅「普及金融」，總之希望市民能享有基本銀行服務。

今期講到部份現有客戶遭銀行諸多刁難，好似有市民收到銀行要求回簽問卷和提供詳細個人資料，份問卷仲長達十幾頁，問題當然鉅細無遺，例如最新住址證明，以及幾十年前第一份工作到現時嘅入息，以及所有資買賣資料等。而且個別銀行措辭一啲都唔友善，只比好短時間人哋回應，如未有按時回覆，戶口就會被凍結或取消。銀行甚至對啲小額存戶都唔放過。

為謹守反洗錢而嚴查可疑戶口，係難以避免，就好似漁夫捕魚總要有網，金管局期望銀行嘅網眼會因應對象有大有小，而唔係一張拖網，大細魚都一網打盡。陳德霖又話，另外收到一宗投訴，關於一家在港從事內地貿易業務30幾年嘅公司，被銀行要求解釋第一桶金嘅來源；又例如一位退休公職人員，被界定為高風險客戶，為年長家屬申請附屬卡時，要填10頁長的盡職審查表格，甚至要提交配偶的遺囑證明財富來源。

金管局認為銀行咁做，既不符「風險為本」嘅監管原則，亦不符普及金融的精神。金管局開到聲，銀行自己識做啦！

港人金融知識亞洲第一

香港人搵錢最在行，阿婆阿伯都識炒股，金融知識自然有番咁上下。投資者教育中心噚日就話，根據經濟合作與發展組織（OECD）嘅國際調查顯示，30個主要經濟體嘅成年人金融知識與能力，香港整體水平全球排第五。喺四個受訪亞洲市場中，香港整體水平更加係排名第一。

喺三個評核因素中，「金融常識」得分最高。香港人對通脹、投資風險及單利息等基本概念都好熟悉，不過再問深啲有關複利率問題，就得返58%受訪者答啱有關問題。

不過，港人嘅「理財態度」就差啲包尾，排二十九名。「理財行為」亦排第八，反映這兩方面港人表現麻麻，好大原因係香港人傾向短視近利，賺到少少就抽身，無咩耐性放長線釣大魚為未來着想。有42%受訪港人無制定長遠理財目標，以學生及在職年輕人嘅意識最弱。少於30%港人有長遠嘅理財態度，比起加拿大同紐西蘭等國家逾60%人低得多，呢幾方面就有待改善喇。

(Source: 頭條日報 20161101 - http://hd.stheadline.com/news/daily/fin/508704/)